Donna Ruth, Donna Ester, Donna Noemi.
Figuras senza tempus,
imprentadas
in cassias de chercu chin s’isgubbia.
E tue, Efix, teraccu senza paga,
chin sa bertula garriga ‘e rimursos,
Efix, camina.
Peri campos abertos
ue s’arzat froridu s’iscrareu,
subra sos montes aspros
ue han vida sos elighes nieddos
che pantasimas malas,
ti pessighidi andende
s’anima ‘e Don Zame,
sa maligna
anima senza pasu
e iscramat vinditta e penetensia.

Efix, camina.
Corrasi, Bella Vista, Monte Uddè.
Efix, camina.
S’anima t’es fattu
e allonghiat sas francas dae onz’ala.
Bardia, Santu Juanne, Monte Nou.
Onzi tuppa ‘e mudregu
unu rimursu acutu,
unu peccadu nou a donzi passu
e unu signu ‘e rughe.
Longu es su caminu e malu, malu
ma no bastad ancora
a iscontare tottu sos peccados.
Sos peccados
s’iscontan prima ‘e tottu in custa vida
e in s’atera poi.
Su samben ch’has ispartu
subra su monte ‘e Galte
domandat penetensia, penetensia.

Efix, camina.
Peri campos abertos
ue s’arzat froridu s’iscrareu,
subra sos montes aspros
ue han vida sos elighes nieddos,
rimursos appostados,
camina, Efix, camina, fin’a cando
sutta su pesu ‘e tantu penare
t’enin mancu sa forzas in caminu
e rues chin sos ogros a su chelu
e sos pes a sa janna.

Como has pasu.
Su penare es finidu.
Lughene in su caminu attraessadu
sos ranos de su trigu ei sos fiores
de isperanzias noas.
Tue has fattu.
Su viazzu cumpridu ti ch’hat zuttu
a inue s’appianan sos cuntrastos
e umpare brindan meres e teraccos.
Gai, a sa muda, in punta ‘e pes lezzeu
leas ateru viazzu, senza fine,
in campos senza laccana
ue s’arzat froridu s’iscrareu
e murmuran sas cannas a su entu.