'Elosia

Cando ti giamo e tue non ti mustras,
nara inue e cun chie ses gioghende,
a chie, disvelada, li ses dende
su chi a disora in segretu m’illustras.

Nara a cales in coro lis as postu
su pidinu de t’ider cuntentada,
che cando a mie ti ses presentada
nende chi fis giamada e as rispostu.

Musa, Musa de me ti ses brullende,
de ite ses in gana custu sero?
No mi fetas che deris, derisero:
chi t’apo intesu impressada arrivende,

e che rundine, in bolu m’as leadu
puite de carignos fisi in gana,
e tando, chentza leare mattana,
che imponente riu m’as trazadu.

E como mi ses puru lende a giogu:
m’ides istracu e chentza nd’aer gana,
ma che deris mi giamas, rufiana,
paghe ancora mi chircas e disfogu.

Cando t’apo connotu no ischia
chi gai meda fimis sos amantes,
e totu ti los basas sos ‘galantes’,
cara e sintzera amiga poesia…

Franco Piga (Romana ‘SS’)
Santu Aìne 2006