Lassannelu su nidu 'e sa natia
Che rundine a metzoru leo volu
Picannemi a su coro disconsolu
Piango che piseddu a mama mia

Derettu si mi ponet su rajolu
Pessanne 'a sa passada pitzinnia
Su pessu est pro tene sol’ebbìa
Chi m’has pesadu liberu crapolu

Ma como so custrintu e ligadu
A chircare vortuna in aterue
Ca inoche so 'itzu isfortunadu

Su surcru 'e su naviu restat cue
Pro mustrare a su 'itzu emigradu
Sa ghiratura a uve allatas tue