Cantas bortas mind enit a sa mente
cosas chi lezo dae zovania
pro lu poder trasmitere a sa zente.

M’ammento bene s’enciclopedia
chi cunteniat una bell’istoria
subra sa greca mitologia.

Paret sa cosa chi esserat notoria,
chi unu fizu de Zeus e Calice,
sas Deas l’ant cuntesu e fatu boria.

Prima fit re de s’Elid’e felice,
istiat in s’olimpia regione,
ma pro issu Selen est peccatrice.

Fit bellu e fit re Endimione,
chi de sa luna sa famosa dea
l’at zuradu amor ‘e passione.

E pigada che fit a cussa sea
a su Monte Latmo pro lu iere
e l’osservare sa pessone intrea.

Contare non si podet né iscriere,
chi sol’a biere cussa criatura,
non fit in cabu ‘e prangher ‘e né riere.

Sind’est innamorada e sa bellura
chi solamente a l’iere drommidu
li ricatat pro sempre sa figura.

E aiat zuradu e promitidu
chi pro lu poder bier’e basare,
a unu sonnu eternu lu at punidu.

Gai zovanu deviat restare,
in modu chi selene incantadora
anderat onsi notte a l’agattare.

De un ateru modu intendo ancora
chi pro esser de Era innamoradu,
Zeus l’at maleidu che colora,

e benit a chimbant’annos cundennadu
a cantu paret da su re de sos deos
chenza mai si esser ischidadu.

Ma s ‘in custos iscritos non b’at neos
in sa biblioteca Apollodoro
est issu chi si faghet contos feos,

sos pensamentos c’aiat in coro
non cherind’ afrontare sa etzesa
si cheriat drommire e non l’innoro.

Pero Zeus de nou e cun lestresa
a su Monte de Latmo lu pigada
pro torrare cun Era a tal’impresa.

Lu drommid’e a una roca lu ligada
Artemide a sos trint’annos ‘ndel’ischidada