'Enide, si cherides, a ballare,
cun su zippone 'e seda, de belludu,
a sos pitzinnos damos un azudu,
como su ballu podet cominzare.

Cale costume pones ite importat,
'irde, nieddu, ruju, o finas grogu,
allegros divertimos in su giogu,
su colore 'e sa pedde prus non contat.

Ballamos, tottu umpare, a duru duru,
'ogamos de su coro sos sentidos,
bellos, lughentes, raros, coloridos,
chi dae nou illuminen s'iscuru.

S'adduramos in tundu tott'istrintos,
a manu tenta prontos a girare,
su sole at'istentare a che calare,
sos ànimos d'amore an' esser tintos.

Cun sa bertula a coddu, fatta a ranos,
carignos isparghimos che siendas,
prantamos in su mundu tantas prendas,
semenamos rispettu a prenas manos.

Andamos tando in giru in donzi domo,
covazza e candelarzu dimandamos,
tottu su chi nos dan che lu leamos,
b'at zente 'e bonu coro finas como.

Aberimos a donzi continente,
sas jannas de s'affettu, de s'amore,
prenamolas de gosu, de calore,
nessi s'ispera damos a sa zente.

Sos frades ch'attoppamos in caminu,
saludamos cun su risittu in laras,
a tottus regalamos cosas raras,
sas prellas chi tenimos in su sinu.

Cun trumas de lieras mariposas,
bolamos in su mundu, in sas aeras,
finidas sun sas terras furisteras,
sas làcanas sun tessidas de rosas.

Sonamos tando allegros sos tintinnos,
a boghe manna abboghinamos paghe,
e tottu cantos sutta 'e cussu umbraghe,
in su ballu brincamos che pitzinnos.

Seconda classificata al concorso di poesia "Paraulas de azudu" - Premio 2013 Bosa