Che bentu chi treme sa carena
Si boliat chene l’issettare
Ti picat e non ti lassat istare
Gai Eros ti manna custa pena.

Chin sa frizza Eros t’ha(t) feridu
E si lu progas non podes sanare
Ma ti custringhet a forza a l’amare
Finzas chi non t’ha(t) cussumidu.

Est unu ocu chi brujat a d’onz’ ora
E dae solu non bi l’aches a istuttare
Non podes nemmancu iscappare
Chene cadenas ti ligat ancora.

E non b’a(t) modu de tinne liberare
Pares unu zombie caminanne
Die e notte b’istas pessanne
E no as in mente mancu ‘e mannicare.

Che una nave chi chircat de torrare
In sa tempesta a unu portu sicuru
Gai ses bortuladu tue puru
Dae sas undas artas de su mare.