Est de su tempus arcanu deinu
di Giovanni Piga

Artu si pesat, che boche sinnada,
chin alas de pinnìa e coro 'e preda,
istramande sas àgheras de seda
chin d-unu toccu 'e alas rebentiu,
da' su nidu 'e sas umbras su Sentiu
chircande in sa resone una bubada ...

Unu jocu 'e pessos? ...: Una gherra
prò non rùgher in franca 'e su podere
e bardare s'isteddu 'e su dovere
chi dat ìnnida luche a sa cussèntzia
ingraninde s'ispica 'e s'esistèntzia
che fruttu 'e gosu in custa cruda terra.

Jocat chin s'òdiu, ballat chin s'amore
in sas cussorjas grispas de sa mente ...
disinnat de sas dies su benente,
sicunde s'accasazu 'e s'intellettu,
imbentande manzanos de affettu
... o arbèschias grisadas de dolore ... ?

Est de su tempus arcanu deinu
de su cras tzeravallu, sos sentores
de sa luche distillat, sos umores
intesset de s'iscuru a filu 'e trama,
de su bene e su male luche e frama
chi de s'omine sinnat su caminu ...

Che grina 'e sole isparghet tott'in tundu
ocradas moddes, rujas attrivias
supra undas d'isporu, resentias,
ch'andan e torran in su mare isortas
in d-unu jocu 'e isperas sortas
imbiadas dae s'anima 'e su mundu ...

Si non li pones jocu 'e marrania,
intesset de isettos sos disinnos
d'unu benente 'e pache a sos pitzinnos
de cussas terras ube a respirare
ebbìa est una sorte ... e su campare
est goddetta 'e pacare a sa nadìa ...

Si lis porris sa manu, chene chertu,
dat lucura a sas pragas de s'impannu,
in coro 'e sa resone e de s'affannu
chi tropedit su passu fittianu
de su pessare, prò chi su manzanu
arbescat pro su mundu a coro apertu ...

Primo Premio nella sezione rima a tema imposto al “Premio Logudoro 2008 di Ozieri”