Dae s'artura in uè collocare
sas eras geologicas fan cherfìdu,
s'istoria 'e Bolotana tue as bidu
sutta sos pes tuos caminare.

As bidu parte monte brusiare
dae fogos chi sas venas fan ferìdu,
sitos cun funtanas uè pasàre
sas carenas istraccas an potìdu.

As bidu e dominadu dae s'artura
sas baddes chi coronan custa idda,
sos campos mudos de suore estìdos.

E de sa zente sa forte vida dura
as profumadu da fruttos e armidda
e sustentadu forzas e sentìdos.

___________

Si frimmat inoghe su entu frittu
mandadu dae roccas e canales,
paret chi s'imbrenughet a s'artu situ
acchintàdu de piantas seculares.

Inoghe chercos, niberos colossales
cun èlighes umbrosos ch'an abìtu;
orminan su terrinu beneìtu
cun sos porcrabos varios animales.

Est connetta in totùe de Palai
sa punta prus arta marghinesa,
orgogliu de sa idda 'e Bolotana.

Si la visìtas no irmentigas mai
de s'universu ch'ies sa bellesa,
de su chelu s'aera frisca e sana.

___________

As bidu puru sos campos laoràdos
in sas epocas d'oro, de grandesa,
sos Massazos chi fintzas a betzèsa
aìan continu sos chizos sueràdos.

Ma tantos zovanos chi forza e ricchesa
fin de sa Idda intrea, sun emigrados
a terra istranza e in pagos sun torrados,
truncande de sa Idda 'onzi difesa.

Cantu sambene cuss'emigrazione
b'at ispartu in tantas terras istranzas;
ma sos Bolotanesos, cun passione

e cun tanta valentìa an operadu
in totùe, e s'ischit chi maganzas
est raru ch'in logu b'appan lassadu

__________

Ma in sos pàsidos seros de s'istìu
cando sa cantilena de sas frinas
moen sas fozas, e-i su ciulìu
de sos puzones affortin sas raighinas

de arbures fungudas, torrat blu
s'incantu de su monte; a deghìnas
a ti chircare omìnes e femìnas
che lompen, in costante murmurìu.

E cun sa tua mudesa attraente
a issos faghes logu, e lis contas
de seculos de istoria ch'attraessadu

an custa chima tua imponente,
da uè continu medis e affrontas
isfìdas de custa parte 'e su creadu.

In Bolotana, 2017