EST TOTTU ABBANDONADU

Caru Cuginu so meda cuntentu
ischire ch'istas bene,e chi ses sanu
e chi a mie tenese in ammentu.
Deo che tue, mizzasa lontanu,
isto pensende a sa terra nadia
a die, a notte, a sero e a manzanu.
Ca cun sas alas de sa fantasia,
bolo a cussu nobile terrinu,
peret chi mai mancadu bi sia.
Ma no este pius cuddu giardinu
pulidu e trabagliadu cun amore,
che cando a nois giughiada in sinu.
Canta pena mi faghede, e dolore
sento in coro, idende abbandonadu
sa matta, su fruttu, e su fiore.
In sas terras c'haimis paltinadu,
bi sun passadas, ruspas e tratores
truncos e raighinas nd'han bogadu.
E da sos camopos,amas e pastores,
sun'isparidas, baccas e baccalzos,
aidatones, orto e laores.
Ne frailes bi hada, ne frailarzos,
ainos, boes'e, caddos istallone,
ne molinos, e mancu molinalzos.
In sas domos, sos termosifones
bi sun como, a postu 'e sos foghiles,
e su metano a postu 'e sos titones.
Sa resina, giampadu hat sos gianniles,
fattu c'hat fora mesina e cubone,
carradellos, lireddas, e bariles.
Palas de furru, iscobil'e, fuscone,
tribide, ispidu,griglia e suladore,
sun como attrezzos de collezione.
Sun cambiende finas su Folklore,
no cherene poetes in sas garas,
ma cappellones a fagher rumore,
cun trumbasa, tamburos'e fanfaras,
fin'a, su Santu faghe disonore,
Caru Cuginu, tue ite nde naras?

Mimmia Soro (Olanda)