La fàmmi “nièdda”
di Gigi Noce

Un pizzìnnu...quattr’ossi
dui occi manni;
da cabu a pedi
imburiggàddu a sàia

La manarèdda proba a fà l’ingesthu
di mandàzzi la moscha chi l’isthràga
e a frubìssi lu muccu chi li fara.

-Eba e zùccaru- dìzi lu duttori
punèndi un piattu in manu di la giàia
poi z’esci pianu
chena fà rimori...
Abà v’ha di magnà
ma no ni magna.
II
Lu “Restaurant”
d'una ziddài africana
pienu di gran gintòria
ischattufèndi
cammarèri allisthrìddi sò arrigghèndi
gran piatti assai licchìtti;
in d-un cuzòru
la musigga è sunèndi

e pròpriu fattu fattu
quattru pizzìnni
i’ l’algha busthuràdda
so zirchèndi ricàtu
impari cu’ li cani e li sarròni

-Inogghi acciàppu sempri di magnà.
La collèra? Passadda!
ma... m’è paruddu propriu di murì
e isthòggu sempri mari
da la dì.

Un pizzìnnu...quattr’ossi
...dui occi inviddriàddi
figgiùrani lu zéru, ipampanàddi;
cun d-un carignu
vi l’è tanchèndi giàia
e l’assaccàrra bè
dréntu a la sàia.