Fedales
di Cristoforo Puddu

Fimis fedales de tempos nòs.
Semus creschidos che medas
cotivizende sos sinnos
de su maju franzesu
e su disizu 'e cumprire
sos sonnios de Antigone
nos hat affranzadu e trattesu
in sas contonadas iscurigosas
haian connottu da-e sempre
sa murra abboghinada
e su cuncordu sarragadu 'e 'inu
a sizillu 'e amiganzias
zuradas cun d'un'ograda liera.

Ma su tempus mudat impresse
e sa 'idda nos paret furistera
che a chie 'enit da-e addae.

Semus frimmados in pagos
- ispramminados che fenu in su entu -
de cantos haimus cretidu
e arbattadu sa terra 'e sos coros
pro la 'ider carpida
da-e su semene 'e sos beranos nostros.

E COMO
U'EST SA CAPAZIDADE 'E APPURARE SU CRAS
CANDO SU DERIS E S'OE NOS TORMENTAT?.......

e unu fogarone 'e sentidos alluppiat
mentres sa zentz nostra ti tudat
chenza haer ischidu gosare 'e su viver.
Ateros fedales e beranos han a brotare
in custas biddas chenz'accunortu.

(Illorai)