Narat Franciscu Kafka, s'iscritore,
ch'at isse a s'Academia contadu
ch'unu tazu crudele cazzadore
l'at in sa Costa 'e Oro tenturadu,
essende iscimpanzè tando minore,
isparendelu a logu delicadu,
diligu 'e non lu cherrer fontomare
chi mandat sos profumos a su nare.

In sa gabbia a culu furriadu
che colaiat sa vida mezzana
prite de ider non teniat gana
sos viles chi l'aian intopadu.
Cando su mapamundu isse at ziradu
cussa zente in carignos med'istrana,
zinzilende sas melas, rataiat
in su tretu chi a isse piaghiat.

Si cheriat pro pagu libertade
che issos si deviat divertire:
an cominzadu 'e bona volontade
a rier pari pari a si ruspire.
Gai est chi ch'at devidu ingullire
sas virtudes issoro in cantidade:
pipare, rier, bufare abbardente,
lezer, iscrier, traigher sa zente.

Ma pro esser prus omine cumpletu
che pizzinneddu ch'est curtu a iscola.
Ma fit med'ispibillu in s'intelletu
e fit tropu pro una mastra sola
chi curriat che una mariola
e ch'est finida 'e sa pelea in letu.
Ca unu alunnu gai intelligente
pediat tropu cosas frequente.

Prima de che finire rue rue
at cunfessadu chi sos ignorantes
sun gai angheleddos riposantes
chi bastat de lis narrer: “Frimmu cue!”.
Però, si de ischire sun amantes,
tando a sa mastra, ponen grae nue.
E gai custa mastra 'e s'istrapazzu
a sa fine pariat un istrazzu.

Poi est zumpadu a sas superiores
inue de pius di divertiat.
Tra sas gabbias isse brincaiat
ue fin sos illustres professores
chi li faghian totu sos unores
cand'isterriat totu su ch'ischiat.
Isse pro libertade e pro inari
issos s'imbrogliaian pari pari.

At connotu culturas genuinas
rutas in su desertu poveritas;
ignoranzias de segare a fitas
sen'ipocritas fin beniaminas;
etères grecas viles e safinas
fin a ispantu che banderas gitas,
trastes, cando a iscopu non serbian,
ch'in d'onzi logu los fuliaian.

Imparende guasi cun istima
ch'est diventadu mes'iscenziadu.
Tando a meraviza at isoladu
tra neurones su famosu enzima
ch'in iscola est cramadu “idiotima”,
e pro cussu l'an totu imbidiadu.
Ammaestradu in campu europeu
in cunferenzas pariat su deu.

Ma cando in altos sognos tue bragas
sa libertade afogas in berritas.
Non ti divertis prus, non t'imbriagas,
non tenes pius pasu inue abitas.
De zente 'e onzi repula t'allagas,
totu ti asan paren sodomitas.
Non ti lassan in pasu in sos cungruos
mancu faghinde sos bisonzos tuos.

E tra sos tantos olimpicos deos
in iscialos, rebotas paladinos
chi, mustrende feridas e trofeos,
olvidan chi fin prima babbuinos,
isse puru, tra gloria e anneos,
devet mustrare ogetos genuinos,
est custrintu 'e mustrare volonteri
cudd'antiga ferida 'e su paneri.