In s’apposentu de su cherrer ischire
ballan sas dimandas chena oghe,
arressas in sa gana de unu disizu arestadu,
morighende in sa chijina de un’apiliu
affraigadu in sos cavanos
de una luna chena cara.

Sa trudda pertunta de sas bramas
ischelat bisos ingraidados de appittu,
in su caminu isconnottu de su essere.

In sas giuntas de un’occasu iscabadu
s’est drommende, istraccu, su sole.

Cando sa franca ‘e s’iscuru
ettat sa nassa a sa die,
pasturende lughinzos de aera,

tando

esso deo, in imbaru ‘e saurra,
Atlante nou a poderare su mundu,
pro giogare sa sorte intro ‘e un’istella,
tessende, a lenu a lenu,
lorumos de fiocca cun rajos de sole.