Finas ocannu Deus
di Antiogu Cappai Cadeddu

Finas ocannu deus b’est proande
unu messagiu a mandare de amore,
Issu, de s’universu su signore,
a nois poberu si est presentande.
Unu esempiu de dare est chircande
a sos potentes e guvernadores,
a ingugliones e mandigadores
chi su mundu sun arruinande.
Ca como lu bidimos beramente
chi est andande totu in bancarruta
da su esser surdos a cussu messagiu!
O Deus manda de lughe unu ragiu
innantis chi che ruemus totu a suta
de sa ruina ‘e sa terra e de sa zente!

... e como... alé... improvisamos unu ‘rep’!

... bos cherzo augurare bona pasca
peró mi essit sa rima lasca
ca no la zuto in sa tasca
ca una neula la fascat
ca custu sonetu
lu dia cherrer perfetu
ma debadas mi finigo su cherbeddu
chircande nessi unu paghitzeddu
de agatare sa rima... fizigheddu? iscureddu?
bambineddu!
...emmo... gesu bambinu
chi como nos benit a vicinu
ca sende deus si faghet poverinu
e nos inditat su bonu caminu
chi est finas una famosa presone
inue che dian cherrer postos sos ladrones
totu sos imbrogliones
chi ingannan sa populatzione
ancu lis beten s’aba santa a fulcone
totu sos banchieris usureris intrallatzeris
bancarruteris
cussos de oe de crasa e de deris
chi cun coro lizeri
si prenan sas bussacas bolenteri
cun su tribagliu de sos arregateris
chi no an dinari mancu pro s’alberi
che sono ridotti all’osso
mentres issos mandigan a piú non posso
e faghen morrer de famene sos de sa banda ‘e giosso
est a narrer sos de su terzu mundu
chi no an tzertu su coro giocundu
ca su contu no lis bessin tundu
e no solu cussu
ma sos ricos pro mantenner su lussu
che sun betande in s’aria unu flussu
de sos gassos chi causan s’efettu serra
chi sun betande sa natura a terra
ca a prantas e animales faghen gherra
e an cambiadu su clima de sa terra
cando bi penso su coro s’isperrat
ca si sighimos goi si deet iscazare
sa iddia de sas calotas polares
e si artziat su livellu de sos mares
e mirade chi no b’at de brullare
ca su petroliu tocat de lassare
tocat de ponner pannellos solares
chi produen energia pulida
chi a su pianeta mortu torrat vida
tocat de ponner molinos a bentu
pro ponner sa natura in assentu
ma sa cosa printzipale
e no bos nde parzat male
est chi tocat in generale
de biver in manera normale
lassande istare sas modas macas
chi sa terra nde est istraca
ca de alga la semus prenande
de totu sa m.... chi che semus fugliande
chi semper est aumentande
e nos at a esser incarralzande
lassand’istare su consumismu
e su isfrenadu materialismu
e su mai atatu egoismu
e s’ogiu prus mannu chi no sa ‘entre
chi no si prenat mai... mentres
chi in s’istogomo no b’istat
prus de su tantu chi su corpus achistat
e si bi nd’etas in prus ti cuntristat
ca sa salude ti pistat
e ti diat allegrare prus su coro e sa vista
si idinde unu famidu cun aria trista
che lu pones in sa lista
de su cumbidu de s’umanidade
chi in una mesa deen mandigare
dognunu teninde su chi li bisonzat
sena bider s’atuale brigonza
de chie at unfrada de crebare sa ‘udda
e de chie de bi ponner no at nudda
de chie no podet trazare sa panza
e de chie faghet una vida lanza
ca est de aberu possibile
de biver in manera sustenibile
rendinde s’ambiente prus bivibile
dividinde bene su chi est papabile
e faghinde sa paghe prus istabile
ca sa gherra la faghen est probabile
sos chi famene an insuportabile
ma la faghen puru cussos allipidos
malaidos in sa mente e in sos sentidos
chi de podere sun semper famidos
corrudos insolentes ingrandizidos
chelbeddi-russos e cori-ingraidos
ignorantes e ribambidos
ca no l’ana cumpresa
chi in sa vida sa bera richesa
no est a tenner milliardos pro s’ispesa
ma de si setzer in mesa
sena odiu e sena cuntesa
sena malumore e sena ofesa
cun sa massima naturalesa
bidinde sa cuntentesa
e su risu ‘e su bighinu
bufande una tatza de ‘inu
e unu mossu ‘e pane e casu
apende in coro su pasu
e una bona cumpagnia
o unu ticu ‘e aba ebia
sena ambidda ne butariga
bastat unu piatu ‘e cariga
ne polcheddu ne aligusta
si ses cun sa zente giusta
sun bellos finas sos diunzos
a galera sos murrunzos
sa paghe est bella in su coro
est su prus ricu tesoro
chi gesusu nos at dadu
chi in su mundu nd’est caladu
in totu nullatenente
nande a tota sa zente
chi s’istimen pari pari
balet prus de su inari
est sa richesa prus rara
l’at nau finas che guevara:
de sos ateros sos ohis
los diamus sentire nois
propiu in sas carres nostras
sun mias sas penas bostras
e bostras sunu sas mias
e de gai sas allegrias
las diamus cundividire
cussu est umanu sentire
de coros e mentes sanas
chi tota sa ratza umana
semus una famiglia
e diaulu e puntiglias
tra biancos e nieddos
semus totus fizigheddos
de unu babu matessi
chi est deus o a su nessi
de una natura mama
pegos totus de s’ama
de su propiu ecceomo
e abitantes de una domo
chi si narat pianeta
inue s’alga si ch’etat
che in unu muntonalzu
pro si prenare s’iscalzu
de sas ricas incontradas
mirade ch’est incatzada
gaia sa terra bivente
chi si s’airat beramente
si deet iscutighinare
che cane ‘essinde da mare
chi si catzat s’infustura
tota s’umana cultura
che la lantziat in s’ispatziu
ca est sufrinde tropu istratziu
da s’umanu parasita
totu custu nos inditat
chi est a cambiar’istile
pretzisu a nos cunvertire
tempus de perder no b’ada
ca s’istrale est giai cravada
in su mugru ‘e sas piantas
nde las segat totugantas
sas chi no dan bonu frutu
su mundu est casi derrutu
da s’avaritzia ‘e sos mostros
ma sun caules mios e bostros
si no frenamos a tempus
custu malu sentimentu
de s’inguglioneria
zesus zusepe e maria
nos salven da cussos males
e bona pasca ‘e nadale
e mezus annu nou
augúro a bonu prou
a minores e a mannos
... a la festare a chent’annos!
... e si no bos bastat goi
sighidela a iscrier bois...
.................................

paska de nadale 2008