Ses ermosa e galana de presentzia
e de bonas maneras ses cumprida,
amare mi cherias pro tota vida
ca as tentu sa virtude ’e sa passentzia,
e gai in onore de sa tua innossentzia
in regalu ti do sa margarida.

Bella ses e grasciosa de fregura
e ses lepia e lizeri che crapola,
però mai t’apo postu picarola
ca ischis de onzi cosa sa mesura
e ca non benis mancu a sa giura
in donu deo ti nd’ato custa viola.

E ca tue ses ancora giovanedda
bella che a un’istella diamantina,
e ca ses puru brava de corina
a boltas bolas che una puzonedda:
ascultu deo non do a sa frinighedda
donendedi una prìmula eranina.

Chie est sa reina de su coro meu,
cal’est sa gemma mia pius pretziosa?
Ses tue e non nde sias pius dubitosa
ne pro me mai pius sias in anneu,
tue de sa vida mia ses su recreu
e a tie ap’a donare custa rosa.