Fiorid’est su giardinu
de Anghelu de sa Niéra

Fiorid’est su giardinu
E tue passas lestra lestra
Non m’abbaidas mancu in cara
No t’abbizas de a mie.

Coro meu frimmadi in totu
Chena issa no apo vida
chena issa non apo isperas.
Custu est unu mal’antigu
T’innamoras chen’afficu.

Anghela, nessi unu ticu
de amore e de carignas.
Si t’incontro atera die
E mi faghes cust’affrontu
Tando ses mala che raju
Chi m’as colpidu su coro
Chen’iscopu chena ispera.

Ancu rues in su fossu
E no ti potas pesare
E cun su coro feridu
Mi giames a t’ajuare.

E deo fatu redossu
No t’abaide no t’sculte
Gai imparas chi s’amore
No lu podes catigare.