Fippo operàiu ‘e luche soliana
di Pietro Mura

E commo Deus de chelu
a chie canto
cust’ùrtima cantone cana?
A bentanas apertas
a su tempus nobu promissu
a Sardigna
barandilla de mares e de chelos?
Su bentu ghettat boches.
Commo m’ammento:
unu frore rùju
una melagranada aperta
una tempesta ‘e luche
cussa lapia ‘e ràmene luchente!
Fippo operàiu ‘e luche soliana
commo so’ oscuru artisanu de versos
currende un’odissea ‘e rimas nobas
chi mi torret su sonu ‘e sas lapias
ramenosas campanas
brundas timballas e concas
e sartàghines grecanas.
Cada corfu ‘e marteddu
allughia unu sole
e su drinnire
de una mùsica ‘e framas
m’ingravidabat su coro
e mi prenabat sos ocros
d’unu mare ‘e isteddos.
Frailàrju ‘e cantones friscas
camino a tempus de luche
pudande sos mezus frores
in custa paca die chi m’abbarrat
prontu a intrare
in su nurache ‘e s’umbra.
Gai fortzis su sole
in custa die de chelu
est bénniu a cojubare
frores de neulache
chin fruttos de melalidone.

(Isili)