No apo a tenner lughe si non cando
si disbaratten custas uras malas,
e tue as a ispargher ambas alas,
reìna ‘e sas aèras: deo tando
cun cust’amore t’amparo sas palas,
cuntentu solu si cun tegus ando:
che àbile a bolare pròas sola,
subra sas nues andas ‘ola ‘ola.

In sa salude tua agato gosu,
sa paghe de su coro, su recreu;
e ite contat, lizu, custu meu
intrinadu selembru marigosu?
Ca deo non m’isporo po s’anneu,
cantu po unu cras, su prus dudosu:
pro cussu ‘e ojos tuos s’alientu
isetto in sos bratzos de su ‘entu.

Ses tue virtudosa meighina,
alenu santu, sa fada donosa;
po sen’ispina chi siat sa rosa,
no est issa ‘e sos frores sa reina;
e nudda podet, cun d’una diosa,
sa chi mudat in bene onzi ruina:
si vivo est pro te sola, accisu raru,
in notte iscuriosa raju claru.

E in cust’ora non timo peruna
pantuma chi minettet disaùra,
isperantzosu, orminas de fortuna
sighinde chirco s’ispera segura,
mancari siat in sedda ‘e sa luna
apo a agatare prados de ternura:
che neula si ch’andet custu teu,
che nie ‘e ‘eranu s’isolvat s’annèu.

Figlia
Non avrò luce fino a quando non svaniranno questi malvagi destini, e tu, regina dell’aria, potrai dispiegare entrambe le ali. Allora con questo mio amore io ti proteggerò le spalle, felice solo di andar con te, e tu come aquila volerai da sola sopra le nubi.
Io provo gioia solo se stai bene, la pace del cuore, la felicità; e cosa conta, giglio, questo mio sconsolato e amaro stato d’animo? Io non mi sgomento per la tristezza, quanto per il dubbioso domani: perciò attendo la luce dei tuoi occhi, che tra le sue braccia mi reca il vento.
Sei tu il farmaco miracoloso, il respiro santo, la fata leggiadra; e per quanto la rosa sia senza spine, non è certo lei la regina dei fiori, ché nulla può contro una divinità, quella che trasforma in bene ogni disgrazia. Se vivo è per te sola, mio raro conforto, raggio fulgente in una notte di tenebre.
E ora non temo alcun fantasma che mi minacci sciagure; pieno di fiducia seguo orme benevole cercando una speranza sicura, fosse anche sulle groppe della luna, dove troverò prati di dolcezza. Che svanisca come nebbia questo triste lamento, questo dolore come neve di primavera.

Premio Rotary - Flussio 2015