FIZOS DE SU TEMPUS

Fizos avolotados
da su tempus de como…
Fizos, de dogni domo
sas isperas.

Abramìdas, sas feras
current fat’e sos ossos
isetande sos mossos
disizados.

Fizos imboligados
conca e pes e ancas,
de sas peus farrancas
presoneris.

Oe prus chi non deris
est parada sa rete,
fizos ch’in Internete
navigades!

Cale mare sulcades?
Cales abbas profundas?
No’ bintredas in undas
arriscosas!

Abbas perigulosas
cun malos piscadores
cherent pisches minores
intregare!

Fizos, da cussu mare
nde siedas a tesu,
ca za si nd’at intesu
malu mutu!

Mam’e babbu, su frutu
bene lu custoìde,
sas famiglias tenide
aunidas!

Cussas fràziles vidas
ant bisonzu de amore,
che bòcciolos de frore
noitòlos.

Fizos lassados solos
tropu a sa lizera:
signales de un’era
traitora.

Sos ingannos a fora,
sos mintzìdios lontanos
po ch’albescant manzanos
luminosos!

Umiles, virtudosos
e onestos creschedas,
a cumpanza tenzedas
s’amigantzia.

Fizos de s’isperantzia!!!

  Antoni Piras