Fizu chérfidu

di Benito Saba (2004)

Invochende s'avréschida,
ischidadu,
o in chirriolos de 'isos attappadu,
trobojadu,
notte notte chirco
in pelea che murone toppu
de asciare dae s'ispéntumu profundu
inue rutta est s'anima mia.
A s'intrinada pásidu fia,
selenu, de custu mundu attattu…
cun su sonnu, lezeri che de 'attu,
sa battagliola frusca est tzaccarrada
de accusas e iscujas, culpas e neghes.
Su chi deviat accaéssere
no est imbénnidu…
e su chi no deviat,
ca no lu cheria… o non bi pensaia,
est accuntéssidu!
Colados sun sos annos currende
e deo che pitzinnu in giogu nusente
dessignos codissiosos impuntzende,
caddos cansados a lóriga presos,
o áinos tontos tortos abbettiados…
Dies divárias,
no isco si pius bonas, mi sun dadas.

Pásadi, coro meu, ista sàbiu!
Non b'at fadu o sorte,
astru de chelu múdulu e tejanu.
Si t'agattas inoghe, in custu tempus…
su chi ses, su chi as o chi no asa…
fizu chérfidu sese finas tue
de s'Amore chi 'estit sos fïores,
de s'aera nudrit sos puzones,
sos pilos c'as in conca t'hat contadu,
a tie pensat e pro nomen ti giamat!

Carignende est s'assèliu 'e sos chintales…
In s'adde mia est intradu unu 'entu
lebiu e affora sas nues c'at truvvadu.
Est avreschende,
a lúghere su sole at a torrare.

Benito Saba

Questa poesia ha conseguito la MENZIONE D'ONORE al II PREMIO DI POESIA IN LINGUA SARDA "GIOVANNI F. PIRISI PIRINO" - Sezione A - Poesia senza rima - BORUTTA - 2004