Flagellos umanos
di Gaspare Mele

Non bastana sos flagellos umanos
de sa politica, vile, inganniosa,
est puru sa natura disastrosa
cun delluvios malos e uraganos.

E si bulluzan puru sos fulcanos
cun furia tremenda, spaventosa,
destruende cun ira onzi cosa,
iddas, istradas, montes e pianos.

Sas cosas fattas a su vadu ‘e Deus
no ana dura ne cuntenimentu,
s’omine est avaru e imprevidente.

Sa trascurantzia creata mal’e peus,
cand’arrivat su vattale momentu
e su flagellu de cosas e zente.