Fochiles
de Tonino Fancello

Berrittas antigas
si son’affummàs
in sos foghiles
de sos nuraghes tuos
o Sardigna,
“ue s’assuttat sa carre
mustrenca
“ue su brigante ridiat a caddu
e sa notte a lughe‘e luna
tranbucande un’era lastimosa,
“ue sar bramas de su tempus
murghian sa miseria‘e sa terra.

Orassiones de oghu
de pruvera
jumpat sa notte ‘e sos tempos
ninninde sos prantos
de su melare arestes ‘e sas muvras
lastimau in s’abbuttonadorzu ‘e sa
tasca.

S’issaporzu ‘e sa die
nuscat
su tintinniu‘e su mudrecu‘e su monte
“ue sas ruttas orulan s’irfoettu diliriosu
‘e sa oghe ‘e su entu,
sar feras arestes
murmuttan su diliriu
‘e sas traschias luridas de sa notte.

Sos gambales untaos a lardu,
istrissian in s’areste ischina tua
o Sardigna,
trazande sos peccados de su chentenariu
su fusile a bacchetta
priore ‘e su lampu‘e su oghu
muttiat
sos bandidos a su radunu‘e sa cussorza.

Primo Premio Concorso Regionale Sassari Circolo “Culleziu” (25 Maggio 2013)