Fortza dispari
de Antonio Altana

Arrampicas ispera in altas turres,
suspiras iscias1 betzas tra sos ruos,
arestadu in carreras chi non curres.

Dissignos tra disànimos e fuos
intro promissas còrvulas2 de icunzas,
chiliros prenos de corzolos cruos.

Ispatos3 de rujores cun sas runzas...
porris calighe licu a sas chimeras,
messende lanzos ranos tra sas frunzas.

Férulas4 e truiscu5 in camineras,
chena cambales, ludos e pistija6,
calarighes7 ch'istraman sas banderas.

Chijina suta bóida cadrija
fuet cun sas frina de sos sentimentos,
lassende brajas d'àstiu in sa fadhija8.

Marranias, políticos chimentos
sutzan s'ultima vena a sas mineras,
in s'angrastolu, aéschidos9 lamentos

modhes a sas ballassas furisteras,
cuntzedin fide a bantos e bijones
de viles remadores de galeras.

Ma candh'iscadhas, candho ti li opones
a dorados ruinzos , candh'ighendhas10
mannalitajos11 cun chie masones

tramudantzias esigit e proendhas12
chen'arriscare mossu ne peleas
in rebotas de istrinas e de prendhas?

Babbos e fizos brujende cadreas
pro arrustire lardu chi a su giaju
li frunin cuddas fertas de trinceas.

E isbarcados fizos de s'ispaju,
acorrados in ricu muntonarzu,
pro truncare pretasas de massaju.

Cabadheris cun bestes de porcarzu
chi pedin grascias pro su chi porchedhan
cun sas furadas foddes in s'ammarzu.

Motos iscoloridos chi achedhan
sos murriuntos13 cun dègumas nostras,
noturnos mossos chi a dedie apedhan...

a paules istranzas de colostras.

-----------------------
1 strisce del seminato delimitate da solchi -
2 gerle -
3 lenire gli arrossamenti con la rogna... (peggiorare le cose)
4 ferula -
5 coccognidio -
6 ortica -
7 biancospino -
8 focolare -
9 ostruiti -
10 alterni -
11 pastori di pochissime pecore che pascolavano le cunette -
12 razioni -
13 burocrati corrotti

Primu Premiu in rima - Romana 2013