Frina
di Larentu Pusceddu

So coladu in s’oru de domo bostra,
inue istades dae cando sa morte
bo ch’at moidu dae bucca sa paraulas,
dae ocros su lucore,
dae sa mente su pensare
e dae coro s’amore e sos disizos.
So intradu e apo osserbadu
sas mazines bostras
chi an firmadu su tempus distrudore.
Ma non sos resessidu,
mancari l’apa disizadu,
de arrejonare cun bois.
Non b’at una risposta
a sas paraulas mias
chi urulan a sa muda
s’afettu mannu chi galu bos apo.
It’est su chi non dia dare
pro bos bider galu, che unu tempus,
acurzu a mie e bos poder toccare.
In custa dimora bostra, pro s’eternu
b’at solu mudimine e solidade.
S’intendet solu s’alinu de sa frina.
Fortzis est issa chi faeddat pro vois,
ma no l’apo cumpresa.

(Inedita)