De su fror' 'e sa menta
s' intendet su nuscore
in sos campos d' inoghe.

De su fror' 'e sa menta

a massaiu e pastore
non bastat prus sa 'oghe
po isparghe sa lamenta

Zeranios de colores
in creja son adattos
ca mudan* sos artares

Zeranios de colores

pagamus sos ricattos
in aèras e mares
de riccos armadores

Su fror' 'e sa tiria
inoghe hat prosperadu
in sas tancas incuras

Su fror' 'e sa tiria

sa terra han ispozadu
puliticas e furas
in custa terra mia

Mendulas in Ghennarzu
frorin a tempus frittu
Sutta sas ghiddighias.

Mendulas in Ghennarzu

travallu chin dirittu
prumintas aurtias
de cada faularzu .

Su nuscu 'e su mudregu
chin iscraria e gardu
a tottue s' intendet

Su nuscu 'e su mudregu

a su chi pedit sardu
non bidet nen cumprendet
s' istadu surdu e zegu.

Frores de ispigas d'orzu
los biccan sos puzones
ca faghen sos irmurzos

Frores de ispigas d' orzu

inoghe a prufessones
astores e gutturzos
curren a su mortorzu.