Sun treghentos sos metros, bidda mia,
chi t'an subra su mare collocada,
ses cun alte, suore e maestria
in terra 'e Pianalza fraigada.

Dae sas friscas frinas carignada,
ti sorriet su sole in d'ogni via;
a totu sos ch'as dadu sa nadia
ses che mama in su coro riservada.

Passentziosa, tempus bonu e feu
in binzas e masones impreadu,
laores cun fadiga as incunzadu,

e che mastra cosidu as isciareu;
e-i sos fizos chi lustru t'an dadu
godan sa paghe cun s'amore 'e Deu.