Fueddus dèpius
de Sandro Chiappori

(...d’una roverella nella primavera che verrà)

Proina
de follas allatzanadas
tremulosas a scurigadroxu
si lassant andai
ressingiadas
me is arruàrgius de s’orvidu.
E trogat su bentu ierrili
chèscias e mudesas.
Ma follas birdis
promìtias de su tempus
ant a torrai a bistiri
is orrolis in beranu
e at a abarrai sceti un’arregordu
de is comas trumentadas
de sa cilixia apretosa
de is diis abbetiosas de ierru.
Follas birdis
duncas in beranu
arregallu de su tempus
chi tocat su coro...
ma su colori boxi no tenit...
e iant a pràngiri is orrolis...
chi pràngiri sciessint.
E tandus s’at a intendi
unu ciulai allirgu
de pillonis me is nais:
melodias comenti fueddus dèpius
de una mat’’e orroli
in su beranu ch’at a benni.

3° Premio Poesia a versi sciolti alla 23ª edizione del Premio di Poesia in Lingua Sarda “Sant’Antoni de su o’u” di Mamoiada