Funtana nuscosa
di Lucia Pinna

B’est una funtana
chi intendo a cada ora
e finzas a de notte
cando m’ischido.
Chie ses tue
chi mi das sa pache
che abba ’e funtana nuscosa:
pache chi so’ chircande
pro su coro
oberau de affannos?
Dae un’atteru mundu
mi das sa manu
chi non cheret esser memoria
ma bida
bida de oje
de sempere
chin sa boche tua
chi mi carinnat s’anima.
Non b’hat esiliu pro nois
o filiferru ispinau:
deo non ti bio
tue non mi bies
ma semus bibende
abba ’e funtana nuscosa.