GADDURA NO MI PARES PIUS TUE

De su Tirrenu mar'in s'iscogliera

frontificad'a su Monte Limbara,

osserbo nascher e morrer sa sera,

osserbo gabbanada Tavolara

sutta s'umbragh'e sa notte serena

ch'isfidat de Nettunu s'unda giara

ateras megaliticas cadenas

in chelos de athalz'arrampicadas

altas e nudas chi mi fachen pena.

E a pensare ch'in eras passadas

in sa tela selvagg'e sa natura

parian custas baddes ricamadas

riccos buscos armentos e pasturas

e sanos ambientes pastorales

daian su risalt'a sa Gaddura;

com'ennidos sos continentales

son'a s'insediar'in sos costiles

cun su turism'internazionale

e ube fin sos rusticos cubiles

che monumentos de cultur'antica

han'elevad'albergos signoriles.

Ogni sanu signal'onzi fatiga

de sos nomades nostros antenados

che sunu canzellende sas istigas

e sos pastores che los han bogados

in ambientes metropolitanos

viven senz'ama e disoccupados

e sognende nostalgicos beranos

su cantu amenu de sa pastorella

li paret milli seculos lontanos,

su murmuriu de sas funtanellas

unu batter de alas improvvisu

de sa perdich'e de sa culumbella

e si domandan, chi est c'hat decisu

in Sardigna de cimentificare

sos mandriles de Costa Paradisu?

Mentre sos sardos sichin'a  migrare

in lontanas cussorjas furisteras

ladros de domo nostra e oltremare

renas e montes faghen a bisera.

Pietro Siotto (Orune)