Gai sos murusinis olvidas
di Larentu Pusceddu

Femina como chi ses sola
chena s'omine tuo, a lettu frittu,
lacrimas non prangas, a sulguttu.

T'isetat sa frina pro cantare murmuttos
cun sos rios jocadores de s'eranu,
s'istajone de sa vida e de s'amore
pro apacare disizos isserrados.

Gai sos murusinis olvidas
de sos orchidos ch'as intesu supra de te,
moendesi favulosos, chena garbu,
pro isfocare subores a sa sola.

E nuda fis, tando, chena cucuzuras ne amore,
pro annos in cumpanzia de unu corpus
chi ateru non bramaiat
si non sas intragnas tuas
buddidas e fecundas.

Pro su restu fis iscràa
e balias tantu e cantu sa bellesa
chi solu a oras ti mudait reina.

(Menzione - Mamoiada 2003)