Galanos lucores de bida
di Franceschino Satta

In chelos d'ispramu
chin ungras d'attarju
su bentu pintat
nues nigheddas
d'abbas disizosas de d'ispàrghere
in terras pragadas.

In s'isèttu,
ammeddòsica s'ispera
de beraniles cànticos d'amore.

Su massaju,
in lappattos d'ispantu
si preparat su coro;
ma juchet s'àlinu in percas de sinu,
arrabbentau de suffertas peleas,
e testat sos alentos de s'aghera
ammestruraos de irroccos d'affusu
e de sentenzias de focu.

Sa Muzere,
manos d'ossos,
mama de sanos pizzinnos iscurtos,
inturtat
chin làcrimas de gosu
su miseru pane 'e s'incras
cupinde
incunzas d'oro.

E chin s'ispera, s'isettu:
durche alapinna 'e suspiros.
Intantu, s'arbana,
in crostas d'anneu
ifferzit
galanos lucores de sole
a sa farche chi sònniat
in chelos de prata
mannucros de cantos d'amore.