… E m'est amigu su bentu:
a manu isterrida sos fiores
sèmenat in tottue
pintende in sa campagna sos colores.
E-i su mare m'est amigu:
a sos frades de aterùe
sa gianna abberit de sa Terra mia,
s'aèra, su sole, sas marinas
a gosare in paghe e pasu.
E-i sas benas ierritzas:
dae su monte a s'adde
sa cantone murmutant manantiale
E dae s'avreschida sa die
m'est amiga fin'a s'occasu
cando dae sas rundas attesu che càbulat,
indeoradas.
E amiga m'est sa lughe
e-i sos isteddos
chi lentore pioent a sas piaes
de custa Isula mia marturiada.
E-i sas pedras assentadas o derrutas
de sos runaghes antigòrios
chi su misteriu mi contant in mudesa
de su tempus barigadu
ue ant tentu
sas raighinas nostras devucas,
mi sunt amigas.

E tottu su mundu cant'est mannu…

…E amigu mi ses tue
frade de Cristos,
frade meu
fizu de Babbu Nostru Soberanu,
biancu chi sies o nieddu,
riccu o poberu,
accurtzu o attesu,,
in su gosu o in sas peleas
sutt'a s'arcada ìnnida
in bratzos a s'infinidu de s'univressu.