Giambu
di Mario Nurchis

Sos trastigheddos de lana for’e moda
chi nde ‘iran dae sos armadios mannos
como chi tebiu comintzat su ‘eranu
non mi giuan a nudda.
Sa minudanscia de avantzu ‘ettada gai
in s’isportinu ‘e sa regolta
non m’attatat mancu pagu.

Deo apo un’istrana mata ufiada;
sa uca, su nare e-i sos ojos pienos de muscas.
Mi naro proite sas titas de mama
sun asciuttas e siccas.
Mi naro proite apo sempre famine
cando m’ischido dae unu sonnu sempre pius longu
e m’intendo pius debile, sempre pius debile
fintzas a cando no’ ap’a essere interradu in cue
umpar a sos ateros pitzinnos
in duna paghe ismemoriada.

Pro chi tue
potas bufare sa birra frisca tua ispumosa
in su mese caldu de triulas
e potas tastare a malagana su geladu tou
in s’aera conditzionada.
Pro chi tue
ti potas iscaldire cun sas cobertas tuas elettricas
e cun sos termosifones tuos
chi ti faghen fintzas suerare
in s’ierru fritu cun s’iddia traitora.