Puite ses cuada,
galana mariposa,
giogamos cun pinzellos e colores;
un'ispiga indorada,
su trigu cun sa rosa,
t'isettan in su padru prenu 'e frores.
Finat su rusignolu,
in chelu andat in bolu,
po pesare su cantu e sos tenores.
Che mancas tue ebbia,
in custa dirundella d'allegria.

Ischiglias e tintinnos,
sonos de melodia,
nos naran chi podimos cominzare;
ma si non ch'at pitzinnos,
non ch'at mancu armonia,
cun chie nos ponimos a giogare.
Giamamos s'arcu 'e chelu,
e finas un anghelu,
andamos tottu umpare a los chircare,
in laccanas de monte,
finas a ube finit s'orizonte.

Provamos a chirrare
sas tintas de sos lizos
po dipingher su chelu, sas aeras;
sas undas de su mare,
de lughe, de lampizos,
leamos po pintare sas isperas.
Po tingher d'ermosura,
sos frores, sa natura,
ponimos frinas raras e lieras.
Sa luna e sos isteddos,
po mudare sa vida 'e sos piseddos.

Torra tando a bolare,
in lacanas de gosu,
ismentiga su luttu e su mudore;
nessi a nos saludare,
e narrer adiosu,
beni, serena, as a retzire amore.

Menzione d'onore premio di poesia "Viniscola" - Sezione poesia in rima - Siniscola 2014