GOBBURA DI LA GENTI ZERRAGGHINA

Bedd’intradda di rasgioni
abbaìdda bedd’inventu
m’ani daddu pa’ arghumentu
una gòbbura a ischribì
no è cosa di ridì
mi’ chi v’è un prémiu mannu
che incugna a cabbidannu
candu l’uba è maddura
già la fozzu la frigùra
si no mi doggu cuidàddu
già lu perdhu lu siddaddu
in chi modu e in chi manéra
lu puèti so in pascéra
tutti in tasthavéddu maru
tutti in zercha di l’aràru
li pittorri a casgiu cottu
e currend’a un pass’a un trottu
so in zercha di la rimma
arrunchendi più di primma
e no sano cosa dì
si fa cionfra o si pignì
pa’ rasgioni di l’isthaddu
di lu fatu tribburaddu
chi la genti zerragghina
abà è giunta menga e cina
chi la vidda è troppu cara
e zi tocca la faldhàra
a incurthazzi un’althru poggu
abà eu no lu soggu
si è contu di fugghiri
li cambiari a muzzigghiri
so arribendi arréu arréu
e lu gardhu e l’usciaréu
so criscendi che paddroni
dizi chi semmu mandroni
ma già z’ani abbaucaddu
un trabagliu z’ani daddu
bonu cun paga sigura
abà tocca a fa la cura
di ziodda e di rugghitta
eba frescha di bruchitta

e isthrinti be’ in fianchi
e li mani beddi bianchi
lisgi lisgi che signori
mancu pani e caurafiori
poni in banca di sigùru
zappuradd’in cuidd’e in curu
ti l’ipassiggeggi in piazza
sunniendiddi una tazza
di zironi e cagnurari
ti z’agati i’ l’ipidari
pa’ via di la bulletta
ch’è faradda che saetta
imbufadda da l’aumentu
l’ENEL rascia in un mamentu
li carasci e l’ipusthini
e zi dassa che mizini
imbiuddaddi in dì di festha
accò l’althra lesthra lesthra
chi la SIP z’ha mandaddu
si no ti dai cuidaddu
già t’acciappi a cur’a mògliu
e in magiu v’è lu fogliu
pa’ dinunzià li be’
masciu meu e ca che te
abà si chi sei impurthanti
finza li puritigganti
so amigghi e so fraddeddi
tutti pàrini maseddi
accosthu a li vutazioni
di biglietti a pruzzissioni
già n’acciappi pa’ l’ischari
e poi mariggaddamari
ti zi làmpani a un’ara
e tu a muccu fara fara
già t’agatti be’ sivviddu
che pabbanzòru siriddu.
.....................................
Mancumàri in puisia
poi giuggà di fantasia
vidé a Sassari puridda
e la genti umbè cumpridda
chena cabassìnni l’occi
immintigghendi li rocci
l’ancareti e l’isthumbàddi
e li mani camcaràddi
chena tuccà robba anzena
e la genti a panza piena
be’ assintadda in casa noba
be’ cuntenta pa’ la proba
di la GIUNTA CUMINARI
ch’ha imbiuddaddu li curràri
e s’ha fattu bedd’anori
pa’ cuidaddu e pa’ primòri
e andi pa’ la ziddài
propiu che si mai mai
candu v’era in marciapiè
loggu finz’e pa’ lu Re
e si posi i’ la vetura
no t’acciappi in disaùra
pa’ zirchà un cuzoreddu
più no ghindi lu zaibbeddu
e a li guardhi chena frùsciu
già no l’esci mancu mùsciu.
..............................................
Si la gòbbura è cumpridda
già ni la fozzu finidda
e si no chena pratesa
diggu in cionfra sassaresa:
“Si no piazi chistha rimma
biggu puru più di primma!”
Bedd’intradda di rasgioni
bonanoti li paddroni!...

M. Antonietta Noce
Nino Fois