Groddada politica
de Antonio Altana

Bator otavas, tiu Anton'Andrì,
cheren pro impanare chin sustantzia
unu tem'atuale e braman si
chi b'apat oz'e sale in abbundantzia.
Ma sun tres dies chi detzido e mi,
pius ispelcio, pius b'at mancantzia,
chei sos bilancios nostros regonales
chi ammuntonan depidu a puales.

Solu chi cussos l'ana imbusciacadu
dae restos de compora politica,
e non solu no l'an documentadu
ma ti risponden azu a donzi critica.
Tale, giunta latziale ch'at furadu
a zent'arressa e a paralitica,
chena cussentzia ma cun vocasciones,
rebbotadu an cun porcos e matzones.

Tue puru Sardigna, tempus faghet
cun donzi cussizeri de s'arrocu,
fateis de proendas largh'imbrocu
a cale siat grodde s'annuraghet!
A bator barras, ca fit a iscrocu,
neis: "Sutzade prima chi si giaghet;
fatende ider sempre chi brigamus
ma chi non bidan su chi manigamus!".

S'afutin puru de sa matematica
cando si faghen su cont'annuale.
Ca cun sa Lombardia ch'apo a pratica,
cant'a nois afrancat uguale
pro pagare groddada diplomatica.
Gai, sos nostros mustran su giuale
de million'e mesu de persones
ma cun corros de deghe milliones.

Gai amus bidu Capelladu e Bossi,
Polverini Formiga chin Caldoro,
tinghendesi sa laddara cun s'oro.
"Chin sos intentos chi tenian fossi."
Comente nezis bois pro sos de Ossi
puru si fit pro modas e decoro.
Tand'isetamu sa ventura cria,
si s'abbila non ciochit un'istria.

Ti'Anton'Andrì, dademilu oe
cuddu chi nezis in su trintatrese:
"Tue ses de sa patria s'eroe
cando fidele a sa patria sese."
Ca oje su massaju in die noe
a cossumidu s'alanz'e su mese
ma custos, ca los amus post'in altu,
incunzas de austu an gia in Maltu.

Custa isteit imbiada a su cuncursu de poesia Anton'andria Cucca de Ossi