Ijones Tancadas
de Antonio Altana

Imbolos de sentidu a grogu raju
tzirigat su passadu a frascias rujas
in ammarzu cuadu, fertas crujas
tra sacarros de ismentigu niadu
e dae chizos un'utiu penadu
ischidat umbras chi fin de ammaju.

Che lanedda de pedras in trainu,
timende sas pienas de s'atunzu,
m'abbivat sas freguras a murrunzu
in cuzol"e tzelembros. "Prite como
torras a pienare custa domo
de ammentos aeschidos in sinu?"

"Prite removes frea già marcada
in custos chizos mios carasados
chi si sichein cando imbenujados
pedein perdonu chena bera gulpa?
Prite m'as inserradu fide e pulpa
mudende punt'e agu in un'ispada?"

Cantas giuradas sìncheras che lizu
prò sa disgrascia de su testimonzu,
m'as refudadu pro ponner lionzu
a su rancore chi as allatadu
chin cudd'amore chi fit ispuntadu
da un'ojada de su prim'abbizu.

E oje ‘utiende sas pupias,
bido tra issas sas lagrimas tuas
e duos coros in aeras cruas
chilchende chimas pro bi fagher nidu,
ma tropu penas an su briu feridu
e vanas torr'a mover fortzas mias.

Fortzas chi suen numes de Giunone
chi agnanghen a coros bator laras,
in armonias intonadas, giaras,
ch'isparghen su chi restai a Pandora
e serente sos coros l'indeora'
unu carignu de dulche ijone.

XXIII Concorso di poesia “Culleziu” di Sassari 4° Classificato sezione B