Immoi chi est casi tempus de memorias,
de torrai in is moris de su coru
a danzai pensamentus e disigius
comente daddarincas de landiri
furriendi e fuendi in pamentus pendius
e nimancu su tempus st unguentu
chi pozzat lungi o abrandai su surrungiu,
su turmentu, immoi, comenti torrat su bentu
deu puru seu torrau. Cun passus lebius,
piticus, po intendi, po ascurtai e cumprendi
su mudimi de unu schiring'e arrisu lassau.
Ma immoi su tempus est giai passau
o forzis est unu bisu in prus de s'anima
chi si elevat in artu sulena aintru de sa pena
de unu bolidu suffriu di alas de sennoreddas.
Insaras sa terra fragaiat de ladaminis,
de nuscus, de pruìni in s'imperdau de is bias,
de tallus e pastoris. Fragus di argiola, messas,
arrancu de sudoris, de trigus e de loris
in su bentu chi mi contaiat storias.
Issu puru immoi cantat memorias,
memorias ascurtadas a sa fentana…
Sa canzoni de sa cracida beccia
chi calaiat zzicchirriendi a funtana.
Sa matta 'e mela tidongia e de sa figu,
sa crobi chi si bidiat passendi
asub'e i' murus de ladiri, a su mudimi
de is passus lestrus de peis spollincus
in su pruìni calenti de s'imperdau…
Immoi chi casi totu sind'est andau
e no hapu prus terra o lea po affungai
seu torrau piotendi, po intendi
po arrenesci' a annuai, a acapiai
filus suttilis chi mi sighint a sustanziai
custu tempus chi est casi de memorias
e chi mi cantat de tesu 'e tesu istorias
mai scarescias, cuadas e allogadas,
in is intragnas de is arrexinas mias, stimadas.