Immoi anca ses Tui
di Sandro Chiappori

De murru cinixali
est icustu scurigadroxu
chi ti trogat tzacarrendi
immoi anca ses tui.
Impellìu de s’axiu
ses spibionendi asut’ ‘e ‘oxi
arrosàrius de fueddus
in sa minda torra a fari-vari
innui prangis
sa cedda de brebeis tuas
spainadas che perdas annieddigadas.
Pregas e no scis frastimai
arresas fueddus de Fidi
acàpiu corriatzu chi t’allongiat
a una vida arrebentada
chi tropu ‘ortas t’at ingortu.
Fueddus intregaus a s’ispera
speddiosus de icussa Fidi
chi nascit de mitza chi no bis
ma ch’intendis
de sèmpiri
in su sentidu.
Pregas e no scis frastimai
e su chi pedis a Deus
in cust’ora mala
de su disisperu in su scurigadroxu
m’acapiat a tui.

No connòsciu is ogus tuus
ma sciu fradi miu
ca immoi anca ses tui
ses prangendi
e deu cun tui.

Primo classificato ex aequo Sezione Lingua sarda XI Premio di Poesia “Città di Iglesias” 2009