Impàrami a bolare
di Giangavino Vasco

O rundinedda, impàrami a bolare
in cussos chelos nettos, chena nues;
a che pigare cherzo chi m’azues
in mesu ‘e sas aèras assulenas.
In sa terra ch’at solu pagas renas,
de cuss’amore antigu, ‘e seberare.

Cando de tramudare torrat s’ora,
leamiche cun tegus in sas bias
ube unu sole caldu sas biddias
chi tenzo intr’ ‘e su coro mi ch’iscazet
in d-unu riu ‘e ispera, e mi che trazet
in baddes ube nuscos b’at ancora.

Tue chi meritadu t’as rispettu,
in custa terra inube s’amistade
s’est pèrdida, ca custa umanidade
bettande onzi sentidu ch’est a fundu,
naramìlu s’ancora in custu mundu
de bier lughes noas ch’at isettu.

Impàrami a bolare, o rundinedda,
in altu cherzo andare po chircare
dae su chelu, subra ‘e cussu mare,
sa barca ‘e sos afficos, chi sa ghia
ch’at pèrdidu, in tempestas chi bidia
fundàndesi in s’aèra prus niedda.

Ma non mi lasses solu a sa torrada,
ca fintzas deo innoghe apo unu niu,
inube apo regoltu donzi appìu
po sighire sa vida a peleare.
Si non mi bies, beni a mi chircare,
cando donzi tempesta ch’est colada.

Insegnami a volare
di Giangavino Vasco

O rondinella, insegnami a volare
in quei cieli tersi, senza nubi;
voglio che mi aiuti a salire
dove l’aria è più serena.
Sulla terra ci son solo pochi granelli
da poter scegliere, di quell’amore antico.

Quando sarà il momento di migrare,
portami con te nelle vie
dove un sole caldo i geli
che ho dentro il cuore mi disciolga
in un fiume di speranza, e mi trascini
in valli dove ancora vi son profumi.

Tu che hai meritato il rispetto
in questa terra dove l’amicizia
si è persa, perché questa umanità
sta mandando a fondo ogni sentimento,
dimmelo se ancora in questo mondo
c’è qualcuno che aspetta nuove luci.

Insegnami a volare, o rondinella,
voglio andare in alto per cercare
dal cielo, su quel mare,
la barca delle speranze, che la guida
ha perduto, tra le tempeste che vedevo
fermarsi nel cielo più scuro.

Ma al ritorno non lasciarmi solo,
perché anch’io, qui, ho un nido,
dove ho conservato ogni appiglio
per continuare a sopportare questa vita.
Se non mi vedi, vieni a cercarmi,
quando ogni tempesta sarà passata.