In alas de fantasia
di Domenico Angelo Fadda

(decima glossa)

Chi semus umpar‘olende
chen’alas in sos isteddos
mi lu narant sos piseddos
chi cun nois sunt gioghende.

E si ch’andant sos istios
chi fint fogu cun a tie,
s’ièrru ìd’e su nìe
ca m’enin mancu sos brios
ma cun tegus torrant bios
c’affettu mi ses mustrende
in laras mias lassende
afficcu in cussu asu
cantu mi lassat in pasu
chi semus umpar’olende.

Su risu a ti consolare
in alas de fantasia
tes intender s’allegria
ca t’est gosu de pensare
cun nues de passizare
in chelos mai nieddos
cun majìas de faeddos
e naras in bisos tuos
chi de coros nd’ides duos
chen’alas in sos isteddos.

Avantzende est s’edade
chi nos giughet a betzesa
ma su don’e sabiesa
nos mantenet s’amistade
che frade ch’aggiuat frade
brincamus sos iscameddos
ca prommissa fit de aneddos
cun sa manu in sa manu
po a nois est sempr’’eranu
mi lu narant sos piseddos……

….chi che prellas lughen como,
a los bides sos nebodes?
Ite flores ! Ant sas dodes
che su sole chi fentomo
bettan lughe a sa domo
ogni cuzone iscaldende
e ca semus iscultende
de rusignolos sa oghe
sunt puzzones de inoghe
chi cun nois sunt gioghende.

TRINITA D’AGULTU 29.01.2011– 2°Premio L. COSSU – BOCCI DI LI MIMORI