In caminu a disora
di Giovanni Fiori

A fiocchittos lùghidos su mare
paret tott’un’istérrida ‘e laore…
Ah, cantu dîa cherrer in cuss’oru 1
perder sos passos chen’ue ne ora! 2

E bolende in su nudda ammajadittu
in punzos custu mundu astringher tottu
cando sos padros de su chelu nettu
tudan in s’abba su lòrumu alluttu.

Currer a s’isfunada addae addae
s’abba pasada e ampra. E da’ inie
giomper a sa groppera ‘e s’unda noa
pro che ferrer cun issa in atterue.

Bolos de s’ànima! E mundos de lughe
ch’isolven e cuvian, in sa paghe
de sos arantzos, giara e chena neghe,
sa luna manna chi paret inoghe.

Duncas abberrer coloridos bolos
che puzone de abes 3 in sas melas;
e cun sas framas inter rocca e chelos
ispiluccire s’isteddu a puddiles.

Ammajos de mudesa in s’usciareu!
Punna calda ch’abberit s’ala mia
in cust’immensidade a manu in giua
ispizende sas tritzas a sa nue.

Abbratzos de suore... E in su fenu
curridorzas de caddos chena fune...
Como in pettorras torran sos chi funi 4
mannos de seru atzudu e... pês de frina.

A fiocchittos lùghidos su mare…
Dies de linu fioridu in coro…
A fogu atzesu… Istripizu a disora…
Su mundu in-d una làmbria ‘e lentore.

_____________________________

1 oru - nel senso di: lì, in quel luogo.
2 chena ue ne ora - senza luogo né tempo.
3 puzone de abes - sciame d’api.
4 …sos chi funi… de frina - gli avi saggi, coraggiosi e leggeri come la brezza.