IN MUDESA A OJOS SERRADOS

Sa boghe aiscultas
de sa mudesa
chi ti nde battit
su bentu
che alas lébias de puzone.

E, in mudesa,
ti narat
su sucùtu de zente
peleàda
chi làgrimas cuàdas
isparghet in chizos
sena boghe nende
su dolore,
su trumentu,
s’ispera...

E bides,
a ojos serrados,
sos colores bios
de su beranu,
frittas
sas tintas de s’ijerru.

E sighit in mudesa
a trazare
su tempus sas oras
fattu fattu
che rizòlu manantiale
fin’a mare.

In mudesa
sighis
a aiscultare
cun sas orijas
de su coro
risu, dolu e piantu
e, a ojos serrados,
sos colores
sighis a isperiare
de sa vida.

Nino Fois

manantiale = perenne