IN S'ABISSU
Di Lorenzo Brandinu

Che su mare in tempesta
est custu bastimentu
chi sa undas non lassan navigare
siat bacadivu o festa
non b’at intendimentu
chi a carchi portu pothat atacare
no andat e non resta(t)
chin custu movimentu
ne in terra s’agatat ne in mare
ma sos bentos chi girana
in s’abissu profundu nde lu tirana

est sa patria isolana
semper a cufijone
chi de ispera no agatat situ
Vinyls e Othana
sa cascia integratzione
e de trabagliu perdes su diritu
in s’Alcoa li dana
sa disocupatzione
chi a mala pena li pagan s’afitu
e l’annullan bisonzos e disizos
pro issu e sa muzere chin sos fizos

fiorit sa miseria
chi rendet uguales
sos chi non tenen ite mandigare
est veramente seria
ca de totu sos males
su pejus est non poder trabagliare
si una die ‘e feria
li dan sos principales
su trabagliante la depet pagare
ma no s’agatat in custu mamentu
de trabagliare mancu a pagamentu

si in custas abbas feas
pessighis in s’irbagliu
mira sardigna tue nd’isprofundas
o b’a novas ideas
chi diana trabagliu
o a suta ti nde trazana sas undas
su mare chi peleas
promissas de abagliu
però sas pallas sunu semper tundas
si non serras sas fallas d’impostores
tind’afundas chin mannos e minores

Terzo premio al concorso di Santulussurgiu 2014