Atonzina est s’aera e dae chelu
rajos fritos arrivan in sa rughe
s’umida terra che suzat sa lughe
su coro est firmu no issolvet gelu

Perdet sa foza unu fuzidu nughe
in su terrinu formana unu velu
non s’intennet respiru ne anelu
sa tumba est de piantu sughe sughe

Caras chene allegria o in piantu
istan mirenne in brazos d’ammentu
chimas e frores los moghet su ventu
paret ch’isterran su funebre mantu

In bisita ti venzo ocanno puru
mudu ti naro babbu coment’istas
de su munnu videnne ses sa vistas
semper inoghe su vivere est duru

Tottu cuddas giamadas conquistas
cun prepotenzia las an cancelladas
sas cusenzias si sunu infritadas
sun sas aeras nieddas e tristas

Sant’Andria 2015