Non b'at prus firmamentu,
ch'atzendat sas isperas,
biancos sun la luna e sos isteddos;
e bolan in su 'entu,
animas furisteras,
a trumas!........... bàmas de 'oes nieddos,
in padros de mugore,
ramuzande dolore,
chi non lassat alenu e ne faeddos;
ne lagrimas, ne prantu!
..............su chelu ch'at ingultu tottu cantu.

Fiores acchimados,
bellos e de colore,
custa diliga notte ch'at messadu,
caminos sonniados,
chi frinas de mudore,
in sa codina, attesu, ch'an trazadu.
E sa terra nadia,
prena de carestia,
'idriga chi fizos non at pesadu.
Su frade 'ochit su frade!
................. sa morte cheret narrer libertade.

E como 'olan umpare,
in sas abbas de chelu,
chentales rujos prenos de lugore;
ite bellu su mare,
est tintu 'e donzi anelu,
ch'ammadrigan cun laras de amore,
lussias de sentidos,
ranos impoberidos ,
chi fozini briones de calore.
'Ennidu est su momentu,
d'isterrer alas bonas in su 'entu.

Cadenas de belludu,
imboligan s'arcanu,
donzi sentidu faghen alenare;
est de gosu su ludu,
lieru su manzanu,
in s'arcu 'e chelu est tempus de giogare.

Seconda classificata al Premiu 'e poesia sarda "Santu Mauru" - IV edizione
Sorgono maggio 2015