In su chelu hapo 'attu una 'inza noa
inpalcada e ligada in camineras* *filari
post' hapo in s' universu ispallieras
chi garrian a prudones de isteddos,
galassias biancas e bucos nieddos,
pianetas, e cometas chin sa coa.

E totora la miro in sas arturas
in Capidanni e Santuaine
Cando prus no intendo s' aspreine
de s' achina niedda 'ene madura,
e donzi pupuione hat sa durcura
de s' immensu isteddadu e de campuras.

E como in cussu chelu brunittinu
buddit unu cupone prenu 'e mustu,
cando lu buffo l' intendo su gustu
de ervas arestosas primidias
chi m' ammentana sonnios e maias
nottes de troppas e de magasinu.

Nottes chi torran a sa conca cana
chin aromas de dilicu nuscore
cando su coro fermentos d' amore
mandaiat penosu a sas aèras
e su Sole ei sa Luna sas isperas
surcaian che aradu a barvacana.

Como est che binza su chelu isteddau
chi hat dadu vida a cuddos vinos mios
barbatellas chi creschen che pipios
po dare succu d'arcanu licore,
como sò 'inzateri e sò pastore
murghende a vermentinu e cannonau.

Però si non resessit cussa proa
e bessit aspriolu fattu a baccalu* *artefatto
l' hap' a pedire a Deus su meraculu
si intertzedin chin Santu Crispinu.
Po tramudare sas abbas in binu
in su chelu hapo 'attu una 'inza noa.

Primu Premiu in sa Sezione Cannonau - Mamoiada 2022