In su foghile meu
di Giuseppe Concas

Su vinti de zennarzu a mesa die
non m'es s'amigu Pinna istadu avaru:
unu regalu mannu at fattu a mie.

Fruttu de conca sua e d'es chiaru
sa chi amo pro me ch'es poesia,
e m'ammentat s'antigu Montanaru.

Ch'a su momentu pensande non fia,
m'at s'animu cummossu e turbadu
attenttu attentu iscurtande fia.

Su fogu at su calore aumentadu
de sa ziminera in su foghile meu
c'a sos de su Parnasu appo pensadu:

a sos mannos dotados dae Deu
sardos talentos, poetas de onzi zona
Murenu Mossa e Peppinu Mereu

e totu cussos chi sun in corona
sos famosos chi dae s'istoria esistini
de totas musas noe de s'Elicona.

Caligunu 'e como si permittidi
a criticare male cussa rima
e a faccia manna in su palcu insistidi,

nande chi male iscrìan sos de prima
e s'improvvisadu cantu in poesia
de chie su monte toccad'at sa chima.

A bortas non cumprendo sa giuria:
favorini cando a forza che los pigana
che una cuncorda cumpanzia.

Como cun fesserias chende ligan
ca sun in partenza premiados,
poi a faccia manna e sinde frigana.

Nois a fronte arta caminamos
e in su paghigheddu chi l'ischimos
onestamente a sa zente nde damos.

Interessu, tantu, non tenimos
allegros nde semus e cuntentos
mancari andare addàe non podimos.

E rezimos finas cumplimentos
dae zente ch'at talentu, intendidora,
ch'assaborin sos nostros argumentos.

Como 'e finire est'arrivada s'ora,
ti ringrazio tantu amigu Pinna
e dae coro unu saludu ancora.-

In Bolotana su 23/01/2010.-