In su tempus de s’abba chi colat
di Giovanni Chessa

Oje
custas paraulas
dia truvare a ghedda intro 'e aeras,
in traschia de 'entu,
e prus non torren,
s'isperdan inintr'abba proinzana,
s'ispargan in paritzas e astradas
isprìndulas d'unu gùtziu,
che lentore
subra 'e fotza averada,
ch'isvaneschit a chentales.

Las pesso
sepultadas in frisca tuda,
si mai sunu istadas ...bias,
intro' e trèmene o làcanas astrintas;
in sentidu. ..isfortzadu dae amore,

imbichen camineras deris
prenas de farfaruza 'e pessamentos,
chentza ascultare cando muto e gramo;
si iscramo e prango a teju
laras cunsonu non lassen colare.

In die e oje
cun campiana irmurinat...
e paràulas
isolven sos loros
in notte
chi ammóddigat rajolu,

che pantumas.. si mudan e s'acaran
pregontèndemi sinnos,
de tintas tirpiadas dae coro...
a furriu andan,
torran,
che rios... s'asselenan

e pinna leo in manu po l'ifunder
intro 'e su tempus
de s'abba chi colat.

Primo classificato ex aequo al “Premiu ‘e poesia Prantaferru” – Paulilatino, giugno 2010