… pàsida est sa notte
e frimma s’aera.
Sola, tunda e giara
in sas naes de su nìberu,
amorosa, ses frimmada.
Tzertu, tue non ses a como
a connòscher’ sas trassas de sos ómines…
ca basos ebbia non bides
e bisos e suspiros
de amantes indeosados
in s’eternu andare tou.

Tue chi ‘ene connosches su mundu,
nàrami luna galana,
nara: cale àtera zenia
assimizat a s’ómine?
E de tottu sas zenias no est forsis sa prus mala?

Si lìberu naschet
s’ómine e lìberu punnat de ‘istare, prite àteros
ómines est avesu assuggettare?
E pro cale dissignu arcanu
cale, si suffrende ‘idet
un’àteru frade,
nointames de si nd’appenare,
pro duos soddos finit
de l’agabbare?

No est de nàschida
chi s’ómine est tale
e sa rajone l’ant dadu
pro no lu diventare…
ma s’abbrìttiu
chena virtude impreadu
a si reduire l’at battidu
peus de una fera.

Deo ìnnida luna,
amiga carignosa e sorre cara,
àteru ti dia chèrrere
preguntare ma… oramai
iscréttidu e cansidu, sigo, chei sas nues,
in sas carrelas de chelu
a t’ ‘ider’ travigare.

Mentzione de Onore – Setzione B – Poesia in versos isortos Prémiu de poesia in limba sarda “A pes de Santu Padre” – VI Editzione Bortigale 16 de Sant’Andria 2019